თანამედროვე ქართულ ტერმინოლოგიაზე ზედაპირული დაკვირვებითაც კი ჩანს, რომ იგი ძირითადად ივსება უცხო ენიდან ტრანსლიტერაციის გზით შემოსული ტერმინებით: პრიკველი, სიკველი, ნეთვორქინგი, მერჩენთი, დესკტოპი, სკროლინგი, ფრონტ-დესკ ოფიცერი, პატერნი, ფასილიტაცია და სხვა. უფრო მეტიც, ხშირად, ქართულ ენაში უკვე დამკვიდრებული ქართული ტერმინებიც კი უგულებელყოფილია და ჩანაცვლებულია უცხო სიტყვებით. მაგალითად: რითეილი - საცალო ვაჭრობის ნაცვლად, ურგენტული ოპერაცია - სასწრაფო, გადაუდებელი ოპერაციის ნაცვლად და სხვა.

კონკურსში ჩართვა, ტერმინის ქართული შესატყვისის შემოთავაზება ნებისმიერ მსურველს შეუძლია.

კონკურსის ვებსაიტის მთავარ გვერდზე გამოქვეყნებულია ექვსი ტერმინი. მონაწილე ირჩევს ერთ-ერთ ტერმინს და მასზე დაწკაპუნებისას გადადის მოცემული ტერმინის გვერდზე, სადაც ტერმინთან ერთად წარმოდგენილია მისი განმარტება და საილუსტრაციო მაგალითი, რაც კონკურსის მონაწილეებს გაუადვილებს ტერმინის აღქმას. ამავე გვერდზე კონკურსანტი გადის რეგისტრაციას ან ავტორიზაციას (თუ იგი უკვე დარეგისტრირებულია) და სათანადო ველში შეჰყავს აღნიშნული უცხო ტერმინის მის მიერ შექმნილი ქართული შესატყვისი. ტერმინის ქართულ შესატყვისთან ერთად სათანადო ველში კონკურსანტი წერს მცირე დასაბუთებას, რომელშიც ახსნილია მის მიერ შემოთავაზებული ქართული შესატყვისის მართებულობა. კონკურსის ადმინისტრაცია განიხილავს შემოთავაზებულ ტერმინს და მისი მოწონების შემთხვევაში გაააქტიურებს ტერმინს კონკურსის ვებსაიტზე. ტერმინის ვებსაიტზე გააქტიურება ნიშნავს, რომ კონკურსანტმა გადალახა კონკურსის პირველი ეტაპი.